Saamtrek: 19 Julie 2008 op de Aar

From: Johan Matthee [ <mailto:jmatthee@oldmutualpfa.com>
mailto:jmatthee@oldmutualpfa.com]
Sent: 21 Julie 2008 08:46
To: Jaap Kelder
Subject: Saamtrek: 19 Julie 2008 op de Aar

Beste Jaap en Vriende

Ek vertrou dat almal veilig tuis gekom het. Vergun my asseblief vir
oulaas die geleentheid om almal wat teenwoordig was te bedank dat hulle
die moeie en kostes ontsien het om daar te wees. Nogmaals baie dankie
aan Charel Marais en sy span wat soveel moeite gedoen het met die venue
en die ete. Julle is ware staatmakers.

Ek dink ons kan die dag opsom in 'n paar punte:

1. swakdienslewering landswyd is 'n wesenlike probleem;
2. inwoners- en belastingbetalers sit hulle voet neer en eis behoorlike
dienste in ruil vir hulle swaar verdiende geld;
3. daar is 'n werklike behoefte dat BBV's hulself op streek- en
provinsiale vlak organiseer.
4. dit is nodig dat BBV's met mekaar sal skakel om te verseker dat foute
van die verlede nie herhaal word nie;
5. verantwoordelikheid en deursigtigheid is van kardinale belang;
6. voortdurende kommunikasie met inwoners is 'n moet; en
7. affiliasie aan die NBU is baie belangrik.

Ek verneem graag of enige iemand nog iets hierby wil voeg. Ek wil net
byvoeg dat daar 'n gees van samehorigheid en onderlinge ondersteuning
was, iets wat ons in die toekoms nog baie nodig gaan hê. Jaap Kelder

Laat ons nou hierdie inisiatief voortsit terwyl almal goed "ge-charge"
is.

Groete

Johan Matthee
Colesberg

+27 (0)51 753 9281 (telephone)
+27 (0) 82 406 8248 (mobile)
+27 (0) 86 513 8232/ +27 (0) 51 753 9281 (fax)
jmatthee@oldmutualpfa.com (E-mail)

Ouma vir niks Vermoor !!

'Klein, fyn' oumagrootjie beroof en vermoor

'n Oumagrootjie van 81 is vermoor in die huis wat haar man twee dekades gelede gekoop het sodat sy nie "hoef te swerf" nie.

Mev. Yvonne Ribeiro, die buurvrou wat onraad vermoed het, vertel voor die huis in Limpopostraat hoe daar op Opperman se lyk afgekom is. Foto: Linda de Beer

Jul 18 2008 10:07:13:243PM - (SA)

Linda de Beer

Klerksdorp. – 'n Oumagrootjie van 81 is Woensdagaand in Randlespark in dié stad vermoor in die huis wat haar man twee dekades gelede gekoop het sodat sy nie "hoef te swerf" nie.

Mev. Mollie Opperman se lyk is eergisteraand eers ontdek nadat 'n bekommerde buurvrou haar oudste seun, Fanie, gebel en hy haar gevra het om te gaan ondersoek instel.

Nog net 'n TV-stel, 'n handsak en sleutels word uit die huis in Limpopostraat vermis, het kapt. Adéle Myburgh, polisiewoordvoerder, gesê. Die diefwering van 'n sitkamervenster is weggebuig om toegang tot die huis te kry.

Opperman het op haar maag op haar bed, met haar hande agter haar rug gelê toe sy gekry is. Haar kop was in haar kussing, met 'n bloedkol by haar mond. Sy was toegegooi met beddegoed. Sy is vermoedelik versmoor, het Fanie Opperman, wat in Stilfontein bly, gesê.

"Hoekom het hulle haar doodgemaak? Sy was oud. Kon hulle haar maar nie net geblinddoek en in die kamer toegesluit het nie?" het hy gevra. Sy ma was 'n "klein, fyn mensie".

Myburgh het gesê 'n lykskouing sal gedoen word om die presiese oorsaak van Opperman se dood te bepaal.

Mev. Yvonne Ribeiro, Opperman se buurvrou, het gesê sy het die bejaarde vrou nog Woensdagmiddag in haar tuin gesien. Sy was besig om dit nat te lei. Ribeiro het die eerste keer onraad vermoed nadat 'n lid van Opperman se kerk laatoggend warm sop by haar wou aflewer. Sy het nie op die geklop aan haar deur gereageer nie.

"As dit nie vir die kerk was nie, het ons haar nou nog nie gekry nie. Ek het uitgeloop en oor die muur gekyk. Toe sien ek die buitelug by die agterdeur brand. Sy het dit elke oggend afgesit," het Ribeiro gesê.

Teen 20:00 Woensdag het die Ribeiros se bekommernis die oorhand gekry. Sy het Fanie Opperman gebel om te hoor of hy weet waar sy ma is. Hy het hulle gevra om ondersoek in te stel omdat sy tuis moes wees.

"My seun het aan haar slaapkamervenster gaan klop. Daar was nie antwoord nie. Toe loop hy om die huis en sien die gebuigde diefwering." Die polisie is ontbied.

Volgens Ribeiro het Opperman altyd op 'n vraag of sy nie bang is om so alleen te bly nie, geantwoord: "Die Here is met my. Ek is nie alleen nie."

Oorsprong:Beeld
http://www.news24.com/Beeld/Suid-Afrika/0,,3-975_2360120,00.html

Lulu moet waai

Lees die storie by:
http://www.news24.com/Rapport/Hoofartikels/0,,752-800_2360320,00.html

Lulu moet waai

Jul 19 2008 04:01:35:097PM

Die straffeloosheid waarmee die rol van me. Lulu Xingwana, minister
van landbou en grondsake, in die hantering van die Land Bank-fiasko
gehanteer is, is net nóg 'n voorbeeld van regeringslui en hoë
amptenare wat sonder vrees vir tugstappe na hartelus die bates van die
land verkwis...

Die straffeloosheid waarmee die rol van me. Lulu Xingwana, minister
van landbou en grondsake, in die hantering van die Land Bank-fiasko
gehanteer is, is net nóg 'n voorbeeld van regeringslui en hoë
amptenare wat sonder vrees vir tugstappe na hartelus die bates van die
land verkwis of toelaat dat dit geplunder word.

Die verantwoordelikheid vir die Land Bank is die afgelope week bruut
van haar weggeneem en aan min. Trevor Manuel toegeken. Die tesourie is
nou verantwoordelik vir die bank en moet hom weer funksioneel maak.

Dit wil gedoen wees: in die landbousektor word van die algehele
ineenstorting van die Land Bank gepraat. Sy hoë persentasie slegte
skuld sou enige kommersiële bank lankal vernietig het. As voorbeeld
word genoem dat onlangs in net een projek R700 miljoen verloor is. 'n
Verstommende R2 miljard is verkwis sedert die "transformasie" van die
bank begin het.

Die bank gaan al sedert die middel 1990's agteruit, maar dis veral die
afgelope vyf jaar en toenemend sedert Xingwana minister geword het dat
hy aanhoudend verliese ly.

Nie net moet sy as politieke hoof van die bank tot verantwoording
geroep word nie. Sy was regstreeks betrokke by die algehele fiasko en
die ongerymdhede wat verder strek as net verliese. Xingwana is 'n
sentrale figuur in twis op twis by die bank en word van onstatutêre
politieke inmenging beskuldig weens swak aanstellings sowel as
leningsbesluite.

Dis te verwelkom dat sy onthef is van haar verpligtinge by die bank,
maar die vraag is hoekom nou eers ingegryp word nadat die bank op sy
knieë gedwing is.

En intussen bly sy minister. Soos talle ander wat hul
verantwoordelikhede met verstommende onbekwaamheid "nakom". Soos die
minister van gesondheid. En die minister van veiligheid en sekuriteit.
Soos etlike premiers. Soos die geskorste nasionale polisiehoof. Soos
talle burgemeesters.

Die verdraagsaamheid jeens Xingwana en ander se skromelike
pligsversuim is een van die waarmerke van Thabo Mbeki se
presidentskap. Gelukkig word sy politieke lewe nou gemeet in maande en
nie meer in jare nie. Suid-Afrika kan nie wag om die laaste van hom en
sy galery van onbekwame ampsdraers en lakeie te sien nie.

Al positiewe wat uit dié tragiese sage geneem kan word, is dat die
lesse hopelik geleer is. Al is 'n eens trotse instelling in die proses
byna vernietig.

Prof. Jonathan Jansen se studie oor blank studente

Die Verkennerbeweging het met gemengde gevoelens kennis geneem van die
uitsprake van prof. Jonathan Jansen oor die gedrag en ingesteldheid
van blanke studente.

Ons betreur dit egter dat hy skynbaar 'n eensydige studie probeer
onderneem het en as gevolg daarvan slegs eensydige bevindinge kon
maak, en dit boonop interpreteer het vanuit sy eie nie-blanke oogpunt.
As hy 'n meer wetenskaplike ondersoek sou onderneem het, soos om ook
die swart studente daarby te betrek, en selfs sy eie mense, die
kleurlinge, sou daar dalk 'n heel ander bevinding gemaak kon gewees
het.

Om te beweer dat wit studente verkeerd ingelig word deur kerke,
kultuurgroepe en hulle ouers, is verregaande en getuig van absolute
onkundigheid, komende uit die mond van iemand wat nie selfs deel is
van daardie gemeenskap nie. Om op grond daarvan te vermoed dat
sodanige studente hulle tot rasse-aanvalle sou kon wend, kan selfs as
beledigend ervaar word.

Waarom meld hy slegs enkele gevalle wat in die media skeefgetrek is?
Dit was bewysbaar duidelik dat die sogenaamde Reitz "walgvideo" gemaak
is met medewete van die "akteurs" daarin, en bewyse dat daar niks
vulgêrs gebeur het nie, is eenvoudig nie geglo nie. Maar daardie
video was 'n reaksie van studente wat nie gedwonge geïntegreer wou
word nie.

Maar as prof. Jansen sy ondersoekveld sou verbreed het, kon hy by
dieselfde universiteit afgekom het op swart studente wat wit
damesstudente molesteer en verkrag, soos herhaaldelik gebeur het. In
hoeveel gevalle van moorde en plaasaanvalle is dit nie juis swart
jeugdiges wat daarby betrek is nie? Moet ons dan nou aanneem dat dit
ook deur hulle kerke, jeugorganisasies en ouers aan hulle opgedra
word?

Wit, en in besonder Afrikanerstudente, is en word van kleins af
hoflikheid en verdraagsaamheid geleer, ook teenoor die andervolkiges
in die land. Dit is egter onnatuurlike prosesse, soos "affirmative
action", gedwonge integrasie en die sogenaamde regstel van die
"ongelykhede van die verlede", wat wit studente juis in 'n posisie van
ongelykheid in die hede plaas. Dit is bewonderenswaardig dat hulle
ten spyte daarvan, steeds hulle waardigheid en verdraagsaamheid
handhaaf.

Wêreldwyd is die tendens sigbaar van nasionalisme: om die eie op te
soek en met die eie te assosieer: soort soek soort. Dit het niks met
rasse meerderwaardigheid te doen nie. Maar ja, 'n indruk van
meerderwaardigheid sou inderdaad kan ontstaan as studente in Brittanje
gaan werk, sien hoe dat sake daar verloop, vlot, ordentlik en
beskaafd, en hulle sien dat dit in Suid-Afrika juis teenoorgesteld
daaraan toe gaan. Maar dit is nie die wit studente se skuld nie, maar
eerder die swart bewindhebbers se swak dienslewering wat die indruk
van onbekwaamheid laat posvat.

Henk van de Graaf

PRESIDENT

Oupa veg met byl tot die dood toe

*Oupa veg met byl tot die dood toe*

Jul 16 2008 10:39:12:030PM

'n Oupa (82) het met 'n byl in die hand tot die dood toe baklei om sy
70-jarige vrou teen vyf gewapende aanvallers te beskerm.

Virginia Keppler en Elana Carstens

'n 82-jarige oupa van Lombardstraat in Wonderboom-Suid, Pretoria, het
eergisteraand met 'n byl in die hand tot die dood toe baklei om sy 70-jarige
vrou teen vyf gewapende aanvallers te beskerm.

Mnr. Andries Visser sr. (82) is gedurende die aanval ses keer in die maag,
bors en onder die ken geskiet. Dít nadat die aanvallers op sy vrou, Deborah
(70), gespring, haar geskop en geslaan het.

Visser sr. het op sy vrou se hulpkrete gereageer en met 'n byl op die
aanvallers toegesak. Nadat hy geskiet is, het hy in die huis se gang af
gestrompel en voor die badkamer se deur ineengesak waar hy "in 'n plas bloed
gesterf het".

Mev. Visser is in die Little Company of Mary-hospitaal in Pretoria waar sy
vir haar wonde en trauma behandel word.

Dié egpaar, organiseerders van die jaarlikse nasionale jukskeitoernooi vir
senior burgers in Kroonstad, is eergister om omstreeks 21:00 in hul kombuis
oorval.

Me. Mirna von Benecke, polisiewoordvoerder, het gesê mev. Visser wou 'n
buitekamer se deur gaan sluit toe sy in haar kombuisdeur oorval is.

Die egpaar se seun, mnr. Dries Visser jr. (40) van Centurion, en sy kinders,
Juan (9) en Henning (5), het voor die aanval tussen 18:00 en 19:00 by sy
ouers gekuier. "Om 22:00 het ek 'n oproep van my ma gekry dat my pa geskiet
is," het hy hartseer gesê.

"Die rowers het my ma eerste oorval en haar geskop, geslaan en op haar
gespring. Hulle het op haar gespring," het hy in ongeloof herhaal.

Volgens hom het sy ma geskreeu en sy pa het uit die slaapkamer na die
kombuis gehardloop om haar te help.

"Ek weet nie waar my pa die byl gekry het nie, maar hy het probeer
terugbaklei en een van die rowers raak gekap. In die bakleiery het die
rowers hom ses keer raak geskiet."

Visser jr. het gesê verskeie koeëlgate in die gang se mure getuig dat meer
as ses keer op sy pa geskiet is.

Visser jr. het gesê die bure het sy ma se hulpkrete gehoor. "Toe hulle
ondersoek gaan instel, het hulle gesien hoe die rowers oor my pa-hulle se
hek spring en deur 'n gat in die heining oorkant die pad teen die koppie op
vlug.

"Die polisie het die berg by die reservoir met behulp van helikopters
gefynkam, maar die rowers het weggekom. My pa is dood en hulle het 'n
selfoon en my ma se handsak met minder as R200 daarin gesteel. Dit is
belaglik," het hy gesê.

Hy het gesê hy en sy suster, me. Zeldi van Straten (43), is diep bekommerd
oor hul ma omdat sy hartprobleme en hoë bloeddruk het.

Mev. Elna Lubbe (39), die Vissers se peetkind, het in trane vertel hoe
geskok sy is. Sy het gisteroggend haar peetma in die hospitaal besoek en het
gesê mev. Visser is baie deurmekaar van die skok.

"Ouma vertel herhaaldelik hoe Oupa in die gang in sy eie bloed gelê het."

Lubbe het gesê die Vissers se hond is 'n maand gelede vergiftig en dat mev.
Visser glo drie dae voor die aanval 'n groen motor voor die huis sien sirkel
het.

"Dit was asof hulle dit al maande lank beplan," het Lubbe gesê.

Mnr. Basie Smit (71), 'n jare lange vriend van die Vissers wat saam met
hulle jukskei gespeel het, was gister erg ontsteld: "Ek ken hulle al jare en
hy het in 1997 die eerste jukskeitoernooi vir senior burgers in Kroonstad
gereël.

"Andries het tot verlede jaar nog jukskei vir die klubliga gespeel," het
Smit, wat sowat twee strate van die Vissers woon, gesê.

Von Benecke het gesê die polisie ondersoek 'n klag van moord en huisroof.

Visser sr. laat nog twee kleinkinders, Zeldine (9) en Zandré (14), agter.

Begrafnisreëlings is nog nie getref nie.

Lees die storie by:
http://www.news24.com/Beeld/Suid-Afrika/0,,3-975_2358780,00.html

Gewonde hond lê op dooie baas

Gewonde boerboel lê op dooie baas ná huisrooftog

Jul 15 2008 10:22:05:550PM - (SA)

Buks Viljoen


'n Gewonde boerboel het bo-op sy vermoorde jong baas gaan lê nadat dié eergisteraand op 'n plaas naby Komatipoort doodgeskiet is.

Mnr. Jan-Daniel Venter (21) is deur rowers op die plaas Blikkor op die Strydomblokpad naby Komatipoort, waar hy en sy pa, Jan (50), gewoon het, doodgeskiet.

Hulle het glo as kontrakteurs op 'n naburige plaas gewerk.

Jan-Daniel, wat deeltyds in die regte gestudeer het, is verskeie kere raak geskiet toe hy tydens die rooftog glo met 'n stoel in die hand op die rowers afgestorm het. Hy en sy pa het in die sitkamer 7de laan gekyk.

Volgens iemand wat kort ná die aanval op die toneel was, het Jan-Daniel se boerboel berserk begin blaf. Die volgende oomblik het drie rowers by die huis ingebars.

"Ons soek geld; ons soek geld," het hulle glo in gebroke Engels vir die twee geskreeu.

Venter is in die bolyf geskiet toe hy sy pa wou beskerm. Hy het in die sitkamer inmekaargesak en is kort daarna dood, sê konst. Richard Khumalo, woordvoerder van die polisie op Komatipoort.

Venter sr. is glo deur die rowers vasgebind. Hulle het verskeie huishoudelike items, asook 'n .38-rewolwer, gesteel en met sy Nissan-bakkie gevlug. Hy het hom losgewoel en sowat 2 km na die huis van 'n plaasvoorman gehardloop om hulp te gaan ontbied.

By die polisie se aankoms by die huis het die boerboel, wat ook deur die rowers raak geskiet is, glo bo-op Venter jr. se lyk gelê.

"Hy het skynbaar probeer om sy baas te beskerm," het Beeld se bron gesê.

Jan-Daniel se ma, supt. Elarda Venter, is die bevelvoerder van die Modjadjiskloof-polisiekantoor (Duiwelskloof) in Limpopo. Sy was Sondag op die plaas om haar ander seun, Elardus (17), te gaan haal nadat hy vir die skoolvakansie by sy broer en pa gekuier het.

Khumalo sê die moordenaars is vermoedelik Mosambiekers. "Hulle het 'n perfekte Mosambiekse Shangaan-dialek gepraat."

Vyf 9 mm-pistooldoppies is op die toneel opgetel. Die gesteelde bakkie is steeds soek.

Oorsprong:Beeld
http://www.news24.com/Beeld/Suid-Afrika/0,,3-975_2358144,00.html

Inwoners boos oor vrot riool

FORUM:Inwoners boos oor vrot riool en vermorsing

Aug 01 2007 02:07:56:150PM

Eers het inwoners van Bree-destraat, St. Helena, in stinkende, vrot
rioolwater geswem. Nou dam skoon water op en die straat is
ontoeganklik.

Eers het inwoners van Bree-destraat, St. Helena, in stinkende, vrot
rioolwater geswem. Nou dam skoon water op en die straat is
ontoeganklik.

Die derduisende kiloliters water wat na Torontopan stroom en vermors
word, is vir sekere huiseienaars geheel en al onaanvaarbaar.

Al wat moontlik oor dié vermorsing juig, is die visse wat al 'n
geruime tyd in rou riool rondswem en sukkel om suurstof te kry . . .

Mnr. Jan Davis van Breedestraat 1 sê hy het by die munisipaliteit gekla.

"Ek het selfs die brandweer gebel. So kan dit nie aangaan nie.

"Nadat ons huise 'n paar weke gelede in rioolwater rondgedryf het, is
'n gedeelte van die pyp uitgehaal. Dié werkers wou pype heg en ek het
hulle daarop gewys dat dit nie moontlik is nie.

"Verlede Dinsdagaand het hulle tot 23:00 gewerk. Vir my het dit gelyk
asof daar 'n gebrek aan kundigheid is.

"Hier was nog nie 'n ingenieur naby ons nie."

Nog iets wat hom en ander inwoners ontstel, is dat mense hul rommel
sommer op die sypaadjie uitgooi.

Hy het nou adresse en gaan klagtes by die stadsraad indien.

"As die mense nie swart sakke het nie, sal ek vir hulle gee. Só kan
geen mens leef nie."

Lees die storie by:
http://www.news24.com/Die_Volksblad/Streek/0,,5-1220_2157077,00.html

Sannieshof se riool

From: Carien Visser [mailto:flowers2die4@lantic.net]
Sent: 15 Julie 2008 02:46 nm

Hallo Jaap,

Ek glo nie daar is baie mense wat my sal glo as ek sê dat ek 'n heerlike
oggend by die riool oksidasie damme gehad het nie.

Ek en die waterspan en die 78 jarige Reg Trewickj het begin om ons riool
probleme op te los.  Vir die eerste keer is daar vir ons op Sannieshof
'n oplossing wat ons gaan toepas met of sonder betrokkenheid van enige
munisipale amptenaar. Dit word duidelik dat hoe minder munisipale
amptenare betrokke is hoe beter loop dinge.

Sannieshof se huise het almal geslote riool tenks wat op 'n gereelde
basis deur 'n suigwa leeg gepomp word en by die oksidasie damme geledig word.  Vanwee die geen bestuur van die munisipaliteit loop hierdie riool tenks voortdurend oor.

Vandat ons dispuut verklaar het, trekkers en suigwaens herstel het, het ons beter beheer oor die verwydering van riool verkry, maar die oneffektiewe bestuur by die riooldamme het veroorsaak dat ons 'n omgewings besoedelings proses instand gehou het.

Ons gaan hierdie organiese ensieme in ons riool tenks by elke huis toedien wat ons ongeveer R80 per huishouding gaan kos, wat eenmalig toegedien word en as skadelike chemiese middels soos jik, jeyes fluid en domestos nie toegedien word in die sisteem nie, dit vir jaare aktiefbly.  Dit is in elk geval goedkoop genoeg dat elke huishouding kan beskostig om hul riool tenks te verwerk.  

Die biologiese behandeling van dreins met BI CHEM GA.300 P met  BioS TM3112 is 'n gepatenteerde "Bacillus strain" wat in staat is om op organiese wyse alle organiese afval te verteer of degenereer sodat die eindproduk onskadelik is vir die omgewing en riool gevolglik reukloos word.

Ons begin Maandag met geselekteerde toediening van hierdie produk in riool tenks by wonings wat as dit dan by die oksidasiedam uitgepomp word reeds aktiewe ensieme bevat en met die degenerasie van riool in die oksidasie damme volhou.  Hierdie toediening van die produk maak dit ook
vir die werkers meer aangenaam om te verrig en sou die riool tenk oorloop is dit reukloos.  Terselfdertyd bly die organiese ensieme aktief in die riool tenks vermeerder en word die sisteem instand gehou.  Reg het ook organiese produkte wat in die huis gebruik word wat verhoed dat afvoerpype verstop en wat reuke elimineer.  Al die produkte is omgewings
vriendelik en soos hul logo ook së:  "cleaning the environment for a healthier nation."  glo ek dat die meeste van ons daarna streef om omgewings vriendelik te leef sodat die nalatenskap aan ons kinders ons tot eer sal strek.

Ek sal terug rapporteer na die toediening oor hoe dit met ons tussen die "rose en lelies" gaan.  Een ding kan ek julle sê, ons op Sannieshof is klaar gesukkel en ons gaan nooit weer toelaat dat wie ook al van ons verwag om te lewe sonder kwaliteit nie.  Ons sal saamstaan tot die einde toe, maar ons dorp sal 'n suksesverhaal wees omdat die keuse daarvan
bepaal word deur ons intellek en ons daadkrag.

Carin  Visser
SANNIESHOF
NOORD WES

Huisbraak !!

Huisrowe: 'Ons doen nie genoeg'
Jul 15 2008 10:20:06:017PM  - (SA)  

Marietie Louw-Carstens

Polokwane. – Die polisiehoof in Limpopo het gister erken die polisie het te min gedoen om die vlaag van huisrooftogte in die provinsie se hoofstad hok te slaan.

Komm. Calvin Sengani het tydens 'n mediakonferensie by die polisiehoofkantoor aangekondig dat asst.komm. Joseph Maepa, stasiebevelvoerder van die Polokwane-polisie, van gister deur dir. Thomas Shingange, voorheen stasiebevelvoerder van die Polokwane-polisie, vervang is.

"Ons is besig om mannekrag by dié polisiestasie op te skerp," het Sengani gesê.

Dit kom nadat verskeie vroue verkrag is tydens 'n vlaag van huisrooftogte in gegoede woonbuurte in Polokwane. Mnr. Piet Venter (56), 'n bekende sakeman, is tydens een van die rooftogte doodgeskiet en sy vrou, Wilma (54), gewond.

Sengani het ook 'n provinsiale taakspan aangestel om die huisrooftogte in die stad te ondersoek. Die taakspan word gelei deur sr.supt. Nelson Mabotja, hoof van die polisie se eenheid teen georganiseerde misdaad. "Die misdade hou nou al langer as 'n maand aan, so ons is seker dit is goed georganiseerd."

In die jongste voorval gister het twee mans by 'n venster van 'n huis in Faunapark ingebreek en geld, juwele en vuurwapens geëis by 'n vrou (45), wat alleen woon en geslaap het toe die mans haar in haar slaapkamer oorval het.

Insp. Lesiba Ramoshaba, polisiewoordvoerder, het gesê die rowers het drie selfone gevat en gevlug. Die vrou is nie beseer nie.

'n Polisiehelikopter sal ook voortaan die stad snags patrolleer.

Volgens Sengani was daar sedert Junie 17 gewapende huisrooftogte in die stad. Die voorvalle, waarin vyf vroue verkrag is, was in Fauna-, Flora- en -Sterpark. Drie van die verkragtings het die afgelope drie weke plaasgevind.

Die polisie het verlede Donderdag vyf verdagtes vasgetrek wat met 5 van die 17 voorvalle verbind kan word.

Hulle het glo in groepe van drie saamgewerk.

In bykans al die huisrooftogte het die booswigte die eienaars met wapens aangehou en klere, juwele, huishoudelike goedere en motors geroof en in baie voorvalle by huise se skuifdeure ingebreek.

Inwoners is gevra om die Polokwane-polisie te bel by 015 290 6577/8 of 10111 as hulle enigiets verdag opmerk.

mlouw1@beeld.com

Tandarts by skietbaan met eie wapen vermoor.

Dié foto van dr. Paul Mouton is sowat tien jaar gelede geneem. Foto: Verskaf

Jul 14 2008 10:51:08:070PM - (SA)

Leané du Plessis

'n Bekende tandarts van Johannesburg is gister koelbloedig van agter
af met sy eie pistool op 'n skietbaan doodgeskiet nadat rowers hom
vermoedelik bekruip het.

Dr. Paul Mouton (74) se kleinseun, Jonathan (22), 'n Netcare
911-paramedikus, het sy oupa vergeefs probeer red nadat hy op die
toneel aangekom het, het Mouton se seun, mnr. Paul Mouton jr. (45),
gister vanuit sy ouerhuis in Parkview vertel.

Mouton is minstens vier keer geskiet, waaronder twee keer in die rug
en een keer in die regterskouer.

Wát presies gistermiddag by die Durban Deep Rifle Club in Roodepoort
gebeur het, is nog onseker.

"Ons vermoed my pa het na die teiken toe geloop nadat hy 'n paar skote
daarop geskiet het.

"Die rowers het vermoedelik toe oor die heining (aan die agterkant van
die skietbaan) gespring en hom bekruip," het Paul jr. vertel.

Hulle het vermoedelik een van Mouton se handwapens van die tafel af
geneem en hom van agter af daarmee geskiet.

Ene David, die opsigter by dié klub, het kort daarna op Mouton
afgekom, het Paul jr. gesê.

"Lede van 'n mynveiligheidsmaatskappy het op die baan langsaan geoefen
en het David gehoor roep.

"My pa was toe nog by sy volle bewussyn en kon vertel wat gebeur het."

Volgens mnr. Nick Dollman, Netcare 911-woordvoerder, het die
paramedici alles gedoen wat hulle kon, maar Mouton het op die toneel
aan sy wonde beswyk.

Niks is gesteel nie buiten Mouton se Colt Government 9 mm-parabellum,
een van die vier wapens waarmee hy dié dag gaan teiken-skiet het, het
kapt. Lydia Mtila-Dikolomela, polisiewoordvoerder, gesê.

Die ander handwapens is net so op die tafel gelos, tesame met Mouton se beursie.

Mouton het gistermiddag omstreeks 14:00 gaan skiet.

Dit was sy stokperdjie wat hy glo minstens een keer 'n week beoefen het.

Hy het dié liefde ook met ander lede van sy familie gedeel, het Paul
jr. se vrou, Erna, vertel.

"Dis verskriklik om te dink dat só iets juis gebeur het terwyl hy iets
gedoen het wat hy so geniet het."

Volgens Paul jr. is Mouton al twee keer vantevore aangeval. Sowat 16
jaar gelede het rowers hom in sy huis oorval en onder meer met 'n byl
oor die kop geslaan. Mouton het terugbaklei en kon dit regkry om die
rowers uit sy huis te jaag tot in die straat, waar hy sy bewussyn
verloor het.

Agt jaar later is hy in die Olivedale-praktyk in Pres. Fouchéweg –
waar hy tot nou toe gepraktiseer het – aangeval. "Gelukkig het hy het
daardie twee (aanvalle) oorleef, maar dié keer was hy nie so gelukkig
nie," het Paul jr. gesê.

Mouton se vrou, Galena, was gisteraand nog in erge skok.

Oorsprong:Beeld

http://www.news24.com/Beeld/Suid-Afrika/0,,3-975_2357616,00.html

Vrou in eie huis verkrag

Jul 14 2008 10:26:19:703PM - (SA)

Marietie Louw-Carstens

Polokwane (Pietersburg). – 'n Vrou is eergisteraand in die vierde
gewelddadige huisrooftog in drie weke in gegoede woonbuurte in dié
stad verkrag.

Die vrou (21) en haar man is in hul huis in Sterpark deur twee
gewapende mans met skoenveters vasgebind. Die egpaar se vierjarige
dogter was in die huis tydens die rooftog.

Die polisie vermoed dieselfde twee rowers was by al dié huisrooftogte,
verkragtings en 'n moord die afgelope drie weke betrokke.

In die jongste voorval het twee gewapende mans eergisteraand tussen
20:00 en 21:00 toegeslaan.

Insp. Lesiba Ramoshaba, polisiewoordvoerder, sê die rowers het by 'n
skuifdeur van die huis ingebreek. Die egpaar is vasgebind terwyl die
booswigte die huis geplunder het.

Ramoshaba sê die vrou is glo deur die rowers na 'n spaarkamer gesleep
en verkrag.

Haar man en dogter het nie seergekry nie.

Volgens Ramoshaba is die egpaar se selfone en van hul klere gesteel.
Twee TV-stelle is ook gebuit.

Die rowers het daarna in die egpaar se swart Volkswagen Polo gevlug.
Die registrasienommer is FHV 122 N. Enigiemand met inligting word
versoek om die Polokwane-polisie by 0 015 290 6577/8 of die polisie se
noodnommer 0 10111 te skakel.

Dié voorval se modus operandi stem ooreen met ander twee huisrooftogte
en verkragtings.

Tydens die eerste voorval op Donderdag 26 Junie is 'n vrou (38) in
Florapark in haar huis oorval. Twee gewapende mans het omstreeks 20:00
die diefwering van 'n venster oopgebreek. Die vrou, haar twee dogters
van onderskeidelik vier en sewe jaar en hul huiswerker is vasgebind.
Juwele is onder meer gesteel.

Vermoedelik dieselfde twee mans het te voet na die nabygeleë
McDonaldstraat gevlug en by die huis van mnr. Piet Venter (56), 'n
bekende sakeman, ingebreek. Venter is doodgeskiet en sy vrou, Wilma
(54), is in haar been gewond. Geld, juwele en bankkaarte is hier
gesteel.

Op Vrydag 4 Julie is 'n vrou (27) in haar huis in Sterpark verkrag.
Twee mans het ná 20:00 by die agterdeur ingebreek waarna hulle die
vrou en haar 39-jarige man met pistole aangehou het.

Hul hande is vasgebind en lappe is in hul monde gedruk.

Die rowers het juwele, selfone, 'n rekenaar en die egpaar se Mazda
3-reeks motor gesteel.

Ramoshaba sê die rowers is steeds soek en niemand is nog weens die
vlaag van huisrooftogte gearresteer nie.

Intussen wys die polisie se jongste misdaadstatistieke dat
huisrooftogte skerp in Limpopo se hoofstad gestyg het.

Tussen April 2006 en Maart 2007 is slegs twee huisrooftogte by die
Polokwane-polisiekantoor aangemeld.

In dieselfde tydperk 'n jaar later het die syfer tot 32 gestyg.

Huisrooftogte het in Limpopo met 96,9% gestyg. In 2007-'08 is 319
huisrooftogte aangemeld, teenoor 162 voorvalle in 2006-'07.

Oorsprong:Beeld

http://www.news24.com/Beeld/Suid-Afrika/0,,3-975_2357523,00.html